Grafarvogur, innan Gullinbrúar var friðlýstur sem friðland í dag. Jóhann Páll Jóhannsson umhverfis-, orku- og loftslagsráðherra staðfesti friðlýsingu svæðisins í góðum félagsskap Heiðu Bjargar Hilmisdóttur, borgarstjóra. Með friðlýsingunni er einstakt lífríkis- og útivistarsvæði innan borgarmarkanna verndað til framtíðar.
Í Grafarvogi er fjölbreytt smádýralíf í fjöru og leirum sem fóðrar fjölbreytt fuglalíf. Grafarvogur er mikilvægur fæðuöflunar- og hvíldarstaður “reykvískra” fugla. Jafnframt safnast þar saman fuglar á fartíma og safna orku fyrir farflugið. Jóhann Páll sagði m.a. í ávarpi sínu að “Grafarvogur er ekki aðeins falleg vík í borgarlandinu. Hann er hluti af stærra vistkerfi - hlekkur í ferðalagi fugla milli landa og heimsálfa. Þegar slík svæði veikjast eða hverfa hefur það bein áhrif á stofna sem þegar eru undir álagi.”
Vinna við friðlýsingu Grafarvogs hófst samhliða vinnu við friðlýsingu Blikastaðakróar og Leiruvogs sem var staðfest 2022. Í undirbúningi friðlýsingarinnar hafa ýmsir möguleikar verið til skoðunar m.a. í samstarfi við Minjastofnun en fjölbreyttar fornminjar má finna fyrir botni Grafarvogs. Þar eru líka menjar jökulgarða frá lokum ísaldar en friðlýsingin er þó bundin við voginn sjálfan og fjöruna í kring þó möguleikar eru á stækkun svæðisins í framtíðinni.
Staðfesting friðlýsingarinnar er mikilvægur steinn í vörðu þess verkefnis að vernda fjörur og leirur á höfuðborgarsvæðinu. Í Grafarvogi munu fuglar eiga sér griðland um langa framtíð ásamt því sem borgarbúar og gestir þeirra geta notið návistar við óspillta náttúru og dýralíf svæðisins.
Frekari upplýsingar um svæðið eru væntalegar á vefinn fljótlega en hér fyrir neðan má sjá helstu gögn friðlýsingarinnar.