Surtarbrandsgil er mikilvægt í jarðsögulegu tilliti en þar má finna steingerðar leifar gróðurs sem klæddi landið á míósen tímabilinu ásamt steingerðum skordýrum og ummerkjum eftir þau. Minjarnar eru upplýsandi um fornt gróðurfar og loftslag á Íslandi fyrir um 12 milljónum ára.
Aðgengi & upplýsingar
Friðlýsing
Surtarbrandsgil er náttúruvætti í landi Brjánslækjar á Barðarströnd í Vesturbyggð. Náttúruvættið afmarkast af mynni gilsins að austan og að hábrún þess að sunnan, vestan og norðan. Meginmarkmið með friðlýsingunni er að vernda steingerðar leifar gróðurs og skordýra sem er að finna í setlögum, ásamt surtarbrandslögum.
Náttúruvættið Surtarbrandsgil er 272 hektarar að stærð.
Steingerðar plöntuleifar eru ekki endurnýjanlegar og það sem er fjarlægt er ekki afturkræft. Að auki er til staðar hrunhætta úr veggjum gilsins. Fólki er óheimil för um gilið nema í fylgd landvarðar. Frekari upplýsingar um reglubundnar göngur er að finna í tengli á sýningu ofar á síðunni.
• Óheimilt er að ganga í gilið nema í fylgd landvarðar
• Bannað er að brjóta eða fjarlægja á annan hátt steingervinga, þ.m.t. surtarbrand
• Jarðfræðirannsóknir eru háðar leyfi Náttúruverndarstofnunar. Stofnuninni er heimilt að veita undanþágu frá banni við brottnámi steingervinga úr gilinu