Í Breiðafirði má finna meira en helming allra fjara á Íslandi. Allt að 6 m hæðarmunur er á sjávarstöðu flóðs og fjöru og leirur og fjörur því víðlendar. Selur kæpir á skerjum og fuglalíf eyjanna er einstætt, bæði hvað varðar tegundaauðgi og stofnstærðir.
Áður fyrr var Breiðafjörður gjarnan kallaður matarkista Íslands vegna þess að þar leið fólk ekki sama skort og víða annars staðar á landinu ef hart var í ári vegna harðinda, farsótta eða jarðhræringa. Í eyjunum var talsverð byggð og fjölmennar verbúðir, t.d í Oddbjarnarskeri. Eyjabúskapur var um margt sérstakur en hefur nú að mestu lagst af. Enn eru þar hlunnindi af dún- og eggjatöku og mikilvægt er fyrir ferðamenn að gefa gaum að umgengnisreglum við æðarvörp. Breiðafjörður er víða grunnur og sigling milli eyjanna getur verið hættuleg ókunnugum vegna strauma og skerja.
Verndarsvæði Breiðafjarðar heyrir bæði til Vestfjarða og Vesturlands, en það er verndað með lögum nr. 54/1995 um vernd Breiðafjarðar. Umhverfisráðherra fer með stjórn mála er varða vernd svæðisins en Breiðafjarðarnefnd er honum til ráðgjafar um allt er lýtur framkvæmd laganna.
Allar upplýsingar um svæðið er að finna á heimasíðu Breiðafjarðarnefndar.