Norræna hafáætlunin (2025–2027), sem sett er á laggirnar af Norrænu ráðherranefndinni, auglýsir eftir rannsóknarverkefnum til styrktar innan tveggja þema:
- Þema 3: Mengun og áhrif á vistkerfi, með áherslu á plastúrgang og örplast, meðal annars í gegnum vöktun, líkanagerð og lausnir á sviði stjórnsýslu; og
- Þema 4: Sjálfbær nýting og skipulag hafsvæða, þar sem líffræðileg fjölbreytni og loftslag eru lögð til grundvallar stjórnun hafsvæða.
Verkefnin skulu vera stefnumótandi og gagnleg fyrir stefnumótun, þverfagleg í eðli sínu og stuðla að norrænu samstarfi. Þátttakendur skulu samanstanda af að minnsta kosti þremur norrænum löndum.
Til úthlutunar eru 7,25 milljónir danskra króna fyrir tímabilið 2026–2027, og er gert ráð fyrir þátttöku í verkefnum á vegum áætlunarinnar, miðlun þekkingar og framlagi til alþjóðlegra ramma á borð við OSPAR, HELCOM og Sameinuðu þjóðanna.
Vel heppnaðar umsóknir munu sýna fram á vísindaleg gæði, hagnýtt gildi og öflugt samstarf sem stuðlar að sjálfbærri stjórnun hafsins á Norðurlöndum.
Hverjir geta sótt um?
Til að tryggja að fjármunir nýtist á sem skilvirkastan hátt mun Hafáætlunin fyrst og fremst leggja áherslu á að styðja við starfsemi og verkefni sem unnin eru af rannsóknastofnunum og fræðastofnunum í öllum norrænum löndum og sjálfstjórnarsvæðum (Færeyjum, Grænlandi og Álandseyjum). Þessar stofnanir gegna lykilhlutverki í að efla nauðsynlegar rannsóknir sem leggja grunn að þekkingu á stjórnun hafsvæða, mengun, loftslagsbreytingum og vistkerfum sjávar.
Þrátt fyrir að rannsóknastofnanir og fræðastofnanir séu helstu viðtakendur, geta aðrir aðilar einnig hlotið styrk, enda geti þeir sýnt fram á að starfsemi þeirra styðji markmið áætlunarinnar og byggi á vísindalegum grunni.
Umsækjendur eru hvattir til að mynda verkefnahópa (konsortíur) þvert á norrænu löndin. Slíkir hópar skulu samanstanda af fulltrúum frá að minnsta kosti þremur norrænum löndum (Danmörku, Finnlandi, Færeyjum, Grænlandi, Íslandi, Noregi, Svíþjóð og Álandseyjum), eða að öðrum kosti frá tveimur norrænum löndum og að minnsta kosti einu landi utan Norðurlanda.
Fjármögnun og gildistími
Verkefnatímabil: 2026–2027
Heildarfjárhagsrammi verkefnaauglýsingarinnar nemur 7.250.000 DKK. Fjármununum verður skipt jafnt (50/50) á milli þeirra tveggja þema sem auglýst eru, en heimilt er að aðlaga skiptinguna eftir eðli og gæðum þeirra umsókna sem berast.
Áhersla verður lögð á að verkefni séu af slíkri stærðargráðu að þau tryggi nauðsynlega faglega breidd og raunhæf tækifæri til samstarfs milli norrænna landa.
Meðfjármögnun er hvött til.
Umsóknarfrestur er til og með 2. febrúar 2026 kl 12:00
Hægt er að sækja um hér:
Havprogrammet – Tema 3 (Forurensning og økosystempåvirkning) og Tema 4 (Bærekraftig anvendelse og p…