Frið­lýs­ing Gróttu og Sel­tjarnar staðfest af ráðherra

Jóhann Páll Jóhannsson  umhverfis-, orku- og loftslagsráðherra staðfesti friðlýsingu svæðisins í góðum félagsskap Grétars Dórs Sigurðssonar, formanns umhverfisnefndar Seltjarnarnesbæjar í dag. Með friðlýsingunni er verið að vernda einstakt fuglasvæði innan höfuðborgarsvæðisins en upphaflega var Grótta friðlýst árið 1974. 

Grótta er landföst, gróskumikil eyja utan við vestanvert Seltjarnarnes. Verndargildi friðlandsins í Gróttu felst í fjölskrúðugu fuglalífi árið um kring og mikilvægi þess sem varpsvæðis á sumrin. Í Seltjörn er bæði aflíðandi sandfjara og grunnsævi og hún er því mikilvæg hvíldar- og fæðustöð fyrir strand- og sjófugla. Í Seltjörn er að finna vistgerðina fjörumó sem einkennist af smávöxnum og ungum þangplöntum, steinslýi og brimskúf, sem spretta upp á vorin og þekja fjöruna yfir sumarið. Fjörumór er mjög fágæt vistgerð og hefur miðlungs hátt verndargildi en ýmsir fjörufuglar leita ætis í fjörumó. 

Vinna við endurskoðun friðlýsingar Gróttu hófst fyrst veturinn 2019-20 og hefur því tekið nokkurn tíma. Bæjarstjórn Seltjarnarnesbæjar samþykkti fyrir sitt leiti friðlýsingu, í samræmi við tillögu samstarfshóps um endurskoðun friðlýsingar, á fundi sínum í febrúar 2026. 

Staðfesting friðlýsingarinnar er mikilvægur steinn í vörðu þess verkefnis að vernda fjörur og leirur á höfuðborgarsvæðinu og kemur í framhaldi af friðlýsingu Grafarvogs sem staðfest var 4. mars sl. og friðlýsingar Blikastaðakróar og Leiruvogs sem staðfest var 2022. 

Frekari upplýsingar um svæðið eru væntanlegar á vefinn fljótlega en hér fyrir neðan má sjá helstu gögn friðlýsingarinnar.