Náttúruverndarstofnun, kt. 700924-1570, auglýsir eftir umsóknum frá rekstraraðilum sem óska eftir að reka starfsemi í Vatnshelli í Snæfellsjökulsþjóðgarði og bjóða almenningi upp á skipulagðar ferðir og fræðslu í hellinum allan ársins hring í nánu samstarfi við stofnunina.
Vatnshellir er hraunhellir staðsettur í Purkhólahrauni í Snæfellsjökulsþjóðgarði og var gerður aðgengilegur almenningi haustið 2009. Tilgangurinn með aðgengi almennings að hellinum er að efla fræðslu og auka við þekkingu og verndun á þeim verðmætum sem hellar og aðrar náttúruminjar eru.
Við hellinn er þjónustuhús í eigu Náttúruverndarstofnunar sem rekstraraðila er heimilt að hafa til afnota vegna starfseminnar og gerður verður sérstakur leigusamningur um nýtingu þess. Gjaldfrjálst bílastæði fyrir gesti er í nágrenni við þjónustuhúsið. Rekstraraðili skal bjóða upp á daglegar ferðir í hellinn allt árið. Rekstraraðili skal tryggja öryggi gesta og eftirlit með öryggi hellisins, sbr. hrun- eða fallhættu og ástand innviða. Bjóðandi skal bjóða upp á leiðsögn að lágmarki á íslensku og ensku.
Náttúruverndarstofnun auglýsir því eftir umsóknum frá þeim rekstraraðilum sem vilja bjóða upp á hellaferðir í atvinnuskyni í Vatnshelli. Gerður verður einn sérleyfissamningur samkvæmt lögum um nýtingu á landi í eigu ríkisins í atvinnuskyni nr. 100/2021, við umsækjanda sem uppfyllir nánar tiltekin skilyrði. Samningurinn mun gilda til 1. janúar 2032 með möguleika á framlengingu tvisvar sinnum til eins árs í senn. Samningur mun taka gildi 1. janúar 2027. Ferðir þurfa að hefjast skv. samningi í síðasta lagi 10. janúar 2027. Fjöldi gesta í hellinn á sólarhring skal ekki fara yfir 400 manns. Fjöldi í hellinum hverju sinni skal aldrei fara yfir 54 manns, að meðtöldum leiðsögumönnum. Í hverjum hópi skulu ekki vera fleiri en 12 viðskiptavinir. Þó er heimilt að hafa 16 viðskiptavini í hóp ef honum fylgja tveir leiðsögumenn. Náttúruverndarstofnun áskilur sér rétt á samningstímanum til að fækka leyfilegum gestafjölda í hellinum ef niðurstöður öryggisúttektar, ástandsmats, þolmarkagreiningar eða annarrar rannsóknar, sem framkvæmd er á samningstímanum, mælir með því.
Gögn
Rekstraraðilar verða að skila inn þeim gögnum sem eru talin upp hér að neðan og uppfylla eftirtalin skilyrði:
Starfsréttindi:
- Hafa gilt leyfi ferðasala dagsferða frá Ferðamálastofu, sbr. lög um Ferðamálastofu nr. 96/2018. Umsækjandi skal vera handhafi leyfisins. Skila þarf inn afriti af leyfinu með umsóknareyðublaði.
Fjárhagsstaða bjóðanda
Fjárhagsstaða bjóðanda skal vera það trygg að hann geti staðið við skuldbindingar sínar gagnvart kaupanda, sbr. 21. gr. laga um nýtingu á landi í eigu ríkisins í atvinnuskyni.
Fjárhagsstaða bjóðanda skal að lágmarki vera:
- Eigið fé bjóðanda skal í lok árs 2025 vera jákvætt um sem nemur 10% af efnahagsreikningi. Skila þarf inn árituðum ársreikningi frá árunum 2024 og 2025 til staðfestingar í umsóknarferli.
Opinber gjöld
Bjóðandi skal vera í skilum með öll opinber gjöld þar með talið skatt, virðisaukaskatt og lífeyrisskuldbindingar.
- Bjóðandi skal vera í skilum með öll opinber gjöld. Skila þarf inn vottorði frá Ríkisskattstjóra ekki eldra en þriggja mánaða á opnunardegi tilboða eða sambærileg staðfesting frá heimalandi bjóðanda skv. e – certis.
- Bjóðandi skal vera í skilum með lífeyrisskuldbindingar sínar. Skila þarf inn vottorði frá öllum viðeigandi lífeyrissjóðum ekki eldra en þriggja mánaða á opnunardegi eða sambærileg staðfesting frá heimalandi bjóðanda skv. e – certis.
Tæknileg og fagleg geta bjóðanda
Tæknileg og fagleg geta fyrirtækis skal vera það trygg að það geti staðið við skuldbindingar sínar samkvæmt sérleyfissamningi.
Bjóðandi skal uppfylla eftirfarandi kröfur til tæknilegrar og faglegrar getu:
- Bjóðandi skal hafa á launaskrá leiðsögumenn sem eru með reynslu af leiðsögn um náttúru Íslands. Skila þarf inn yfirliti yfir það starfsfólk bjóðanda sem kæmi að starfseminni, þar sem fram kemur reynsla hvers og eins af leiðsögn um náttúru Íslands.
- Starfsmenn á svæðinu skulu allir hafa kunnáttu í öryggismálum og hafa lokið viðurkenndu námskeiði í fyrstu hjálp. Skila þarf inn afriti staðfestingar um að starfsmenn hafi lokið námskeiðinu Fyrsta hjálp 1 (20 klst.) hjá Slysavarnarfélaginu Landsbjörg eða sambærilegt.
- Bjóðandi skal hafa sinnt leiðsögn og boðið upp á skipulagðar skoðunarferðir í íslenskri náttúru að lágmarki í eitt ár á síðastliðnum 3 árum. Skila þarf inn lýsingu á verkefnum bjóðanda síðastliðin þrjú ár.
- Bjóðandi skal hafa á launaskrá leiðsögumann sem kæmi að starfseminni sem lokið hefur námskeiði í landvörslu eða sambærilegu námskeiði frá viðurkenndum skóla. Skila þarf inn afriti skírteinis vegna námskeiðs í landvörslu eða sambærilegu námskeiði sem Náttúruverndarstofnun hefur metið gilt, sbr. 4. gr. reglugerðar um landverði nr. 190/2019.
Mat tilboða
Gerður verður samningur við einn rekstraraðila á fyrrgreindu tímabili. Við mat á umsóknum verða eftirfarandi atriði notuð við mat og val á tilboðum. Sú umsókn sem hlýtur flest heildarstig fær forgang til samningsgerðar:
1 - Almenn lýsing á mati
Tilboð sem fullnægja öllum hæfiskröfum verða metin á grundvelli hagkvæmasta tilboðs samkvæmt lögum nr. 100/2021 um nýtingu á landi í eigu ríkisins í atvinnuskyni. Heildareinkunn hvers tilboðs er summa stiga fyrir gæði og verð.
Hámarksstig eru samtals 100 stig.
2 - Gæðamat (50 stig)
Gæði tilboða eru metin samkvæmt eftirfarandi viðmiðum:
Matsþáttur | Hámarksstig |
|---|---|
Reynsla bjóðanda af því að hafa boðið upp á ferðir með leiðsögn á friðlýstum svæðum.* | 15 stig |
Reynsla af hellaleiðsögn ** | 30 stig |
Bjóðandi hefur átt frumkvæði að uppbyggingu og starfsemi ferðaþjónustu í Snæfellsjökulsþjóðgarði, sbr. 1. mgr. 23. gr. laga nr. 100/2021. | 5 stig |
Samtals | 50 stig |
*Hafi bjóðandi haft leiðsögn um friðlýst svæði sem hluta af kjarnastarfsemi í a.m.k. 3 ár af síðastliðnum 5 árum fást 15 stig. Hafi bjóðandi reynslu af leiðsögn á friðlýstum svæðum fást 10 stig. Sé engin reynsla til staðar fást 0 stig.
** Hafi bjóðandi haft hellaleiðsögn sem hluta af kjarnastarfsemi í a.m.k. 3 ár af síðastliðnum 5 árum fást 30 stig; sé einhver reynsla bjóðanda af hellaleiðsögn fást 15 stig; sé engin reynsla af hellaleiðsögn til staðar fást 0 stig.
Úthlutun stiga fer fram á grundvelli framlagðra gagna og upplýsinga í tilboðum. Aðeins þau gögn sem lögð eru fram fyrir lok frests til skila á tilboðum verða tekin til greina.
3 - Mat á verði (50 stig)
Við mat á verði er gengið út frá þeirri forsendu að verð endurspegli greiðslu fyrir þau gæði, þá sérfræðiþekkingu og þá ábyrgð sem þjónustan felur í sér. Föst greiðsla á mánuði er kr. 900.000,- bundin við vísitölu neysluverðs til verðtryggingar, frá upphafsmánuði samnings. Til viðbótar við fasta mánaðargreiðslu er greitt ákveðið hlutfall af veltu án vsk. Greiðslur vegna afnota af þjónustuhúsi eru innifaldar í ofangreindum greiðslum. Bjóðandi skilar með tilboði hvernig verðskrá muni líta út við upphaf starfsemi. Rekstraraðila er á samningstíma óheimilt að hækka verðskrá umfram launa- og verðlagsþróun nema með fyrirfram samþykki Náttúruverndarstofnunar.
Tilboð rekstraraðila skal sett fram sem hlutfall af mánaðarlegri veltu aðgöngumiðasölu og annarrar veltu tengdri starfsemi í Vatnshelli án virðisaukaskatts. Náttúruverndarstofnun áskilur sér rétt að taka ekki tilboðum sem eru lægri en 3,5% af veltu. án vsk.
Verð er metið þannig að:
- Hæsta gilda tilboð fær fullt hús stiga fyrir verð (50 stig),
- Önnur tilboð fá stig í hlutfalli við hæsta boð.
- Tilboð skal sett fram sem hlutfall af tekjum vegna sölu á hellaferðum sem og öðrum tekjum sem tengjast starfseminni í Vatnshelli án virðisaukaskatts.
Reikniaðferð:
Stig fyrir verð eru reiknuð samkvæmt eftirfarandi formúlu:
Stig fyrir verð = (Hlutfall af tekjum bjóðanda / Hæsta hlutfall af tekjum gildra tilboða) × 50 stig
Skýringar:
- Tilboðsverð bjóðanda er heildarverð samkvæmt tilboðsblöðum.
- Hæsta gilda tilboð er hæsta verð meðal þeirra tilboða sem uppfylla allar kröfur útboðsins.
Dæmi (eingöngu til skýringar):
Bjóðandi | Tilboðsverð | Verðstig |
|---|---|---|
A | 15% af veltu án vsk. | 50 |
B | 12% af veltu án vsk. | 40 |
4 - Heildarmat og val tilboðs
Heildareinkunn hvers bjóðanda er summa stiga fyrir gæði og verð.
Heildareinkunn = Gæðastig + Verðstig.
Tilboð með hæstu heildareinkunn telst hagkvæmast og verður valið til samningsgerðar, að gefnu því að bjóðandi uppfylli allar kröfur útboðsins og ekki komi fram vanhæfisástæður samkvæmt lögum nr. 100/2021.
Kaupandi áskilur sér rétt til að hafna öllum tilboðum, að hluta eða öllu leyti, án bótaskyldu, ef:
- engin tilboð uppfylla kröfur útboðsgagna,
- tilboð teljast ófullnægjandi, óraunhæf eða fela í sér verulega annmarka,
- hæsta boð út frá heildareinkunn telst ekki vera ásættanlegt með tilliti til hagsmuna kaupanda, öryggis, gæða eða framkvæmdar þjónustunnar,
- eða ef forsendur útboðs breytast.
Jafnframt áskilur kaupandi sér rétt til að hætta við útboðið á hvaða stigi sem er áður en samningur er gerður.
Heimsóknartölur í Vatnshelli
| Samtals |
2025 2024 2023 2022 | 33,611 29,106 30,801 28,781 |
Viðvörun fyrir bjóðendur
Athygli bjóðenda er vakin á því að verð er metið þannig að hærra verð leiðir til hærri stigagjafar.
Bjóðendur eru hvattir til að kynna sér matsaðferðina vandlega áður en tilboð er lagt fram.
Umsóknum ásamt fylgigögnum skal skilað rafrænt í gegnum island.is eigi síðar en 10. ágúst 2026. Tilboð verða ekki opnuð fyrr en umsóknartíma liðnum. Fyrirspurnir má senda á tölvupóstfangið nattura@nattura.is merkt „Fyrirspurn Vatnshellir“ og verður þeim svarað eins fljótt og auðið er. Umsækjandi ber ábyrgð á að umsókn og fylgigögn berist á umsóknartíma.
Sá samningur sem nú eru auglýstur gildir til fimm ára með möguleika á tveimur framlengingum til eins árs.
Náttúruverndarstofnun áskilur sér rétt til að vísa frá öllum umsóknum eða hafna einstökum umsóknum uppfylli þær ekki skilyrði sem tilgreind eru í auglýsingu þessari og/eða ef fullnægjandi gögn fylgja ekki umsókn.
Náttúruverndarstofnun mun samþykkja það tilboð sem hlýtur hæst stig í ofangreindum matskvarða.
Gögnum skal skila á íslensku eða ensku.
Ekki er heimilt að nota undirverktaka nema með fyrirfram samþykki Náttúruverndarstofnunar.
Öll gögn umsækjanda verða að berast innan umsóknarfrests en gögn sem berast eftir umsóknarfrest verða ekki tekin til greina. Gildistími umsókna er átta vikur frá því umsóknarfrestur rennur út. Náttúruverndarstofnun gerir ráð fyrir 30 virkum dögum til úrvinnslu umsókna.
Náttúruverndarstofnun hvetur umsækjendur til að vera með vottun Vakans eða sambærilega vottun í gildi, þó slík vottun sé ekki skilyrði og hefur ekki áhrif á umsókn viðkomandi.
Hlekkur á umsóknargátt www.island.is
Umsóknum ásamt fylgigögnum skal skilað rafrænt í gegnum island.is eigi síðar en 10. ágúst 2026.